ఫ్రిడ్జ్‌ పైన పొరపాటున కూడా ఈ వస్తువులు పెట్టొద్దు. పెడితే ప్రమాదమే..!

ఫ్రిడ్జ్‌ పైన పొరపాటున కూడా ఈ వస్తువులు పెట్టొద్దు. పెడితే ప్రమాదమే!

రిఫ్రిజిరేటర్ పైన వస్తువులు పెట్టడం, కవర్ చేయడం వల్ల వేడి బయటకు వెళ్లకుండా అవరోధం కలిగి, కంప్రెసర్ సమస్యలు వస్తాయి. ఖాళీగా ఉంచితే ఫ్రిజ్ మన్నిక పెరుగుతుంది.మన ఇళ్లలో రిఫ్రిజిరేటర్ ఒక ముఖ్యమైన గృహోపకరణం. ఇది ఆహారాన్ని తాజాగా ఉంచడంలో, పాడవకుండా నిల్వ చేయడంలో చాలా ఉపయోగపడుతుంది. 

కానీ చాలామంది దీన్ని సరైన రీతిలో ఉపయోగించకుండా, తెలియకపోయినా కొన్ని తప్పులు చేస్తారు. వాటి వల్ల రిఫ్రిజిరేటర్ త్వరగా చెడిపోవడం, ఎక్కువ కరెంట్ తినడం లేదా కంప్రెసర్ సమస్యలు రావడం జరుగుతుంది. ముఖ్యంగా, రిఫ్రిజిరేటర్ పైన వస్తువులు పెట్టడం ఒక పెద్ద తప్పు అని నిపుణులు చెబుతున్నారు.

సాధారణంగా ఫ్రిజ్ పైభాగం నుండి వేడి బయటకు వెళ్తుంది. అక్కడ మీరు వస్తువులు ఉంచితే ఆ వేడి బయటకు రాకుండా అవరోధం కలుగుతుంది. దాంతో లోపల ఒత్తిడి పెరిగి, ఫ్రిజ్‌లో సమస్యలు తలెత్తుతాయి. కొందరు ఫ్రిజ్ పైన మైక్రోవేవ్, ఓవెన్, మిక్సర్ వంటి భారమైన ఉపకరణాలు పెట్టేస్తారు. ఇవి కూడా వేడిని విడుదల చేస్తాయి. దాంతో ఫ్రిజ్‌లోని గ్యాస్ సరిగా పనిచేయక, లీకేజ్ వచ్చే ప్రమాదం ఉంది. అలాగే కంప్రెసర్ కూడా అధికంగా వేడెక్కి దెబ్బతింటుంది.

కొంతమంది ఫ్రిజ్‌ను దుమ్ము రాకుండా వస్త్రంతో లేదా ప్లాస్టిక్‌తో కప్పేస్తారు. ఇది కూడా తప్పే. ఎందుకంటే ఆ కవర్లు వేడిని బయటకు రానివ్వవు. ఫ్రిజ్ ఎప్పుడూ గాలి సులభంగా వెళ్లేలా ఖాళీ ప్రదేశంలో ఉండాలి. చుట్టూ గాలి ఆడేలా, ముఖ్యంగా వెనుక భాగంలో, కనీసం 5–6 అంగుళాల ఖాళీ వదిలి పెట్టడం మంచిది.

ఆహారం పెట్టే విషయంలో కూడా చాలా జాగ్రత్త అవసరం. వండిన వెంటనే వేడిగా ఉన్న పాత్రలను ఫ్రిజ్ పైన ఉంచడం లేదా లోపల పెట్టడం కుదరదు. ముందుగా ఆహారం గది ఉష్ణోగ్రతకు చల్లారిన తర్వాతనే లోపల పెట్టాలి. లేదంటే లోపల ఉష్ణోగ్రత పెరిగి, ఇతర ఆహారం పాడవుతుంది. అలాగే కంప్రెసర్‌పై కూడా అదనపు ఒత్తిడి పడుతుంది.

మరికొందరు ఫ్రిజ్ పైన చిన్న చిన్న వస్తువులు, పుస్తకాలు, అలంకార వస్తువులు పెట్టేస్తారు. ఇవి పెద్ద సమస్యలా అనిపించకపోయినా, రోజురోజుకూ వేడిని అడ్డుకోవడంలో భాగమవుతాయి. క్రమంగా ఫ్రిజ్ పనితీరు తగ్గిపోతుంది. అందువల్ల, రిఫ్రిజిరేటర్ పైన ఏ వస్తువూ పెట్టకపోవడం ఉత్తమం.పైభాగాన్ని ఎప్పుడూ ఖాళీగా ఉంచండి. అలాగే క్రమం తప్పకుండా ఫ్రిజ్ వెనుకభాగాన్ని శుభ్రం చేయడం, గాలి ఆడేలా ఉంచడం చాలా అవసరం. ఇలా చేస్తే ఫ్రిజ్ ఎక్కువకాలం మన్నికగా, సమస్యలు రాకుండా పనిచేస్తుంది. చిన్న చిన్న జాగ్రత్తలతో మనం ఖర్చులను తగ్గించుకోవచ్చు, ఉపకరణాల ఆయుష్షును పెంచుకోవచ్చు.